“Сургуультай хамтран хүүхэд хамгааллыг сайжруулах нь” төслийн хүрээнд Монгол Улсад хүүхэд хамгааллын үйлчилгээний зардлыг төсөвлөхөд шаардлагатай нийгмийн эгэх хариуцлагын тогтолцоо, арга хэрэгслийг боловсруулах зөвлөх баг шалгаруулж авна.

Хүүхдийг Ивээх Сан нь хүүхдийн эрхийг хангах, түүнийг хэрэгжүүлэх замыг боловсронгуй болгох чиглэлээр үйл ажиллагаа явуулдаг, ашгийн бус, шашны бус, олон улсын төрийн бус байгууллага юм. Японы Хүүхдийг Ивээх Сангийн Монгол Улс дахь хөтөлбөр нь Хүүхдийг Ивээх Сангийн Олон Улсын Эвслийн дэмжлэгтэйгээр “Сургуультай хамтран хүүхэд хамгааллыг сайжруулах нь” төслийг Улаанбаатар хотын Баянгол, Баянзүрх, Сүхбаатар, Хан-Уул, Чингэлтэй дүүргүүд болон Говь-Алтай, Ховд аймгуудын ерөнхий боловсролын нийт 14 сургуулийг түшиглэн 2023 оны 01 дүгээр сараас 2025 оны 12 дугаар сарын 31-нийг дуустал 3 жилийн хугацаанд хэрэгжүүлж байна.

Зөвлөх ажлын агуулга:  

Зөвлөх үйлчилгээний гол зорилго нь Монгол Улсад хүүхэд хамгааллын төсөв боловсруулах, үйлчилгээ үзүүлэх үйл явцыг ил тод, иргэдийн оролцоог хангасан, хариуцлагатай болгоход чиглэсэн нийгмийн эгэх хариуцлагын тогтолцоо болон дагалдах арга хэрэгслүүдийг хөгжүүлэхэд оршино.

Зорилтууд:

• Үндэсний болон орон нутгийн түвшинд хүүхэд хамгааллын төсөв боловсруулахад иргэдийн оролцоог хангах өнөөгийн механизмыг судалж, үнэлэх
• Хүүхэд хамгааллын төлөвлөлт, санхүүжилтийн үйл явцад олон нийтийн оролцоог нэмэгдүүлэх боломжит арга замуудыг тодорхойлох
• Бодит нөхцөл байдалд тохирсон Нийгмийн эгэх хариуцлагын тогтолцоог боловсруулах
• Иргэний нийгэм, орон нутгийн засаг захиргаа, иргэдэд зориулж уг тогтолцоог бодит амьдралд хэрхэн ашиглаж болохыг тайлбарласан гарын авлага, бусад нэмэлт материалуудыг боловсруулах
• Ажил гүйцэтгэх арга барил, чадавх бэхжүүлэх талаар зөвлөмж өгөх

Ажлын дэлгэрэнгүй даалгаврыг энэхүү холбоосоор авна уу.

Зөвлөх багт  тавигдах шаардлагууд:

Зөвлөх баг нь 2 хүний бүрэлдэхүүнтэй байх ба дараах шаардлагыг тус бүр хангасан байна.

Багийн ахлагч – Хүүхэд хамгааллын мэргэжилтэн:

• Нийгмийн ажил, хүүхэд хамгаалал эсвэл холбогдох чиглэлээр мэргэшсэн, өндөр зэрэгтэй байх
• Хүүхдийн эрх, нийгмийн ажил, олон нийтийн хөгжлийн чиглэлээр 7-оос доошгүй жил ажилласан туршлагатай байх
• Иргэдийн оролцоотой бодлого боловсруулах, оролцогч талуудын оролцоог хангасан туршлагатай байх
• Монгол, англи хэл дээр бичиг баримтыг мэргэжлийн түвшинд боловсруулах чадвартай байх

Судалгааны ажилтан – Санхүү, төсөв хариуцсан мэргэжилтэн:

• Төрийн удирдлага, эдийн засаг, санхүү болон холбогдох чиглэлээр мэргэшсэн, өндөр зэрэгтэй байх
• Улсын төсөв, нийгмийн үйлчилгээний зарцуулалтын дүн шинжилгээ эсвэл төрийн сангийн удирдлагын чиглэлээр 5-аас доошгүй жил ажилласан туршлагатай байх
• Нийгмийн салбар, ялангуяа хүүхэдтэй холбоотой хөтөлбөрүүдтэй хамтран ажиллаж байсан туршлагатай байх
• Монгол, англи хэл дээр бичиг баримтыг мэргэжлийн түвшинд боловсруулах чадвартай байх

Бүрдүүлэх материалууд:

1. Зөвлөх үйлчилгээний ажлыг гүйцэтгэх сонирхлыг илэрхийлсэн бичиг. Уг бичиг нь дараахь шаардлагыг хангасан байх ба монгол, англи хэл дээр ирүүлэх:

• Гүйцэтгэх ажлын талаар ойлголттой байгаагаа харуулсан байх
• Ашиглах арга зүйгээ тайлбарлаж, ажил гүйцэтгэх цаг хугацаагаа нарийвчлан тусгасан байх
• Зөвлөхүүдийн үүрэг, хариуцлагыг тодорхойлсон байх

1. Холбогдох туршлагатай байгааг харуулсан хоёр зөвлөхийн танилцуулгыг (CV) монгол, англи хэл дээр ирүүлэх
2. Өмнө гүйцэтгэж байсан ижил төстэй ажлын материалууд (жишээ нь, өмнө боловсруулж байсан стратеги, хүрээ, арга хэрэгсэл, тайлан, зөвлөмж). Монгол, англи хэлний боломжит хувилбараар байж болно.
3. Зөвлөх үйлчилгээний хөлс, аялал болон бусад зардлыг багтаасан үнийн санал, монгол, англи хэл дээр ирүүлэх

Сонирхол бүхий зөвлөх баг  бүрдүүлэх материалыг битүүмжлэн, 2025 оны 8-р сарын 27-ны өдрийн 17.00 цагаас өмнө дараах хаягаар ирүүлнэ үү.

Хаяг: Чингэлтэй дүүрэг, 1-р хороо, Аризона төв, 4-р давхар, Хүүхдийг Ивээх Сан. (Хүнсний 20-ын Мөнгөнзавъяагийн ард, 23 сургуулийн урд талд)

Лавлах утас:  +976-11-329365, +976-11-329371

Хугацаа хоцорсон болон дутуу материал ирүүлсэн тохиолдолд саналыг хүлээж авахгүй бөгөөд зөвхөн сонгогдсон байгууллага, хувь хүмүүстэй эргэж холбогдох болохыг анхаарна уу?