Ховд аймагт хэрэгжиж буй бичил төслүүд буюу Мөст сумын энтрепренер хүүхдүүд
“Орон нутгийн өсвөр үеийнхэнд хувь хүний ур чадвар, Энтрепренершип боловсрол олгох” төслөөс орон нутагтаа эерэг өөрчлөлт авчрах энтрепренер сэтгэлгээтэй хүүхэд, залуусыг дэмжих зорилгоор бичил төслийн санхүүжилтийн тэтгэлэгт уралдааныг 2021 оноос хойш зорилтот 5 аймгийн төслийн сумдад зохион байгуулж байна. Энэхүү уралдаанд ESEL хөтөлбөрт хамрагдсан хүүхэд, залуучууд баг бүрдүүлэн оролцдог юм. Өнөөдрийн байдлаар 135 баг тэтгэлэгт уралдаанд шалгарч, санхүүжилт аван бичил төслийн үйл ажиллагаагаа явуулж байна. Энэ удаад бичил төслийн санхүүжилт аван “Чимэглэл” төсөл хэрэгжүүлж байгаа Ховд аймгийн Мөст сумын “Dream” багаас хийсэн сурвалжилгыг уншигчдадаа хүргэж байна.
Баярт мөчийг мөнхлөн үлдээх “ЧИМЭГЛЭЛ” төсөл
Ховд аймгийн Мөст сум нь нийслэл Улаанбаатар хотоос 1325 км, аймгийн төвөөс 190 км зайд оршдог. Олон ястны өлгий алс хязгаар энэхүү нутагт баярт үйл явдлаа тэмдэглэх тав тухтай орчин, үйлчилгээний газар байдаггүй бөгөөд аймгийн төв орж баярт мөчөө хуваалцахад цаг хугацаа, эдийн засгийн хүндрэл тулгардаг юм. Нутгийн иргэдэд тулгарсан энэхүү бэрхшээлийг Х.Оюундэлгэр багштай “Дрийм баг”-ийн гишүүд гярхай анзаарч, ESEL сургалтаас олж авсан мэдлэг, чадвартаа түшиглэн бичил төсөл бичсэн нь амжилттай санхүүжилт авч чаджээ. Тэдний санаачилсан “Чимэглэл” төсөл нь үйлчлүүлэгчийн хүсэлтийн дагуу аливаа баяр, тэмдэглэлт үйл ажиллагааны үеэр гоёмсог орчин бүрдүүлж, дурсгалын зураг авч, хэвлэж өгөх үйлчилгээ юм. Төслийн гол зорилго нь үйлчлүүлэгчдийн баяр жаргалтай мөчөө хэзээ ч мартагдахааргүй тэмдэглэхэд нь туслах юм. Тэд төрсөн өдөр, Мартын 8, шинэ жил, төгсөлтийн баяр гэх мэт олон баярт өдрүүдэд чимэглэлийн үйлчилгээгээ санал болгож байна. “Дрийм” багийн гишүүд дотоод зохион байгуулалтынхаа дагуу ажил үүргээ хуваарилан авч гүйцэтгэдэг. Д.Номин үйлчлүүлэгчдэд тасалбар тарааж өгч, төлбөрөө цуглуулж, арга хэмжээний төгсгөлд багийнхантайгаа тооцоо нийлдэг. Харин Н.Намуун, А.Анударь хоёр зураг авах зогсолтыг нь зааж, үс зүс, хувцас зэргийг нь янзалж зөвлөгөө өгөх зэргээр үйлчлүүлэгчдэд зураг авахуулахад нь тусална. А.Анударь мөн үйл ажиллагаа бүрийн орлогын тооцоог хөтлөн дансанд хуримтлуулах үүрэг гүйцэтгэж байна. Харин Д.Номин багийн гишүүн Н.Намуунтай хамтран Фэйсбүк хуудсаа хөгжүүлж, зар сурталчилгааг хариуцан ажилладаг.
Залуу энтрепренерууд YouTube-ээс суралцдаг
“Дрийм баг”-ийн гишүүд анхнаасаа чимэглэлийн олон бүтээлч, шинэ санаа олсон боловч шаараа гоё хэлбэрт оруулах аргаа мэдэхгүй байв. Тиймээс чимэглэл хийдэг “RAINBOW” фейсбүүк хуудасны эзнээс тусламж хүсэж, түүнээс зөвлөгөө, туслалцаа онлайнаар авчээ. Тэр цагаас хойш тэд YouTube ашиглан шинэлэг загварын фон хийх талаар өдөр бүр суралцаж байна. Тэд чимэглэл хийх маш их дуртай учраас хичээлийн дараа энэ ажлаа хийхэд ямар нэгэн ачаалал, дарамт болдоггүй гэж ярьж байлаа. ESEL сургалтанд сууж, зөвлөх багш болон ментороосоо зөвлөгөө авдаг тул тэд төслөө хэрэгжүүлэх, багаар хамтран ажиллах чадвартай болжээ.Нэг удаагийн чимэглэлийг 20,000-50,000 төгрөгөөр хийдэг
“Дрийм” баг одоогоор хүүхдүүдийн төрсөн өдөр, сурагчдын “Эрдмийн баяр”, “Үсэглэлийн баяр”, “Эх үрсийн баяр”, “Нутгийн овоо”-ны наадам зэрэг арга хэмжээний үеэр чимэглэлийн үйлчилгээ үзүүлээд байна. Мөн сургуулийн захиргааны хүсэлтээр бичил санхүүжилт олгох “Pitch event-3” өдөрлөгийн тайзыг чимэглэжээ. Сүүлийн үед хуримын машин чимэглэх захиалга ирж байгааг багийн гишүүд ярьж байлаа. Нэг удаагийн үйлчилгээнээс тэд 50,000 хүртэлх төгрөгийн орлого олдог бөгөөд цаашид фото студитэй болохын тулд орлогоо хадгалж байгаа юм. Мөнгөн орлогоос гадна үйлчлүүлэгч эцэг эхчүүд урмын үгээр маш их дэмжиж, сэтгэл хангалуун дахин дахин үйлчлүүлж байгаа нь тэднийг ихээхэн урамшуулж байна. Бизнесээ тогтвортой байлгахын тулд шинэ, содон санаанууд гаргах, гоё чимэглэл хийж, үйлчлүүлэгчдийнхээ сэтгэл ханамжийг сайн байлгах нь чухал. Тиймээс тэд бэлэг хүргэлт болон сюрприз барих чиглэлээр үйл ажиллагаагаа өргөжүүлэх, орлогоо нэмэгдүүлэх, байнга үйлчлүүлэх хүүхэд багачууд, ард иргэдийн тоог нэмэгдүүлэхээр төлөвлөж байна. Мөн цаг хугацаа, зардал хэмнэх, хаягдал бага гаргахын тулд зарим чимэглэлээ дахин ашиглаж болох материалаар бүтээхээр судалж байгаа юм.