Хүүхдийг Ивээх Сан уур амьсгалын өөрчлөлтийг сааруулах төсөл хэрэгжүүлнэ
(Улаанбаатар, Монгол Улс, 2024 оны 8 дугаар сарын 23) Уур амьсгалын өөрчлөлтийн үнэлгээнээс гаргасан судалгаагаар Монгол Улс уур амьсгалын өөрчлөлт эрчимтэй явагдаж байгаа төв цэг дээр оршиж, эмзэг өртөмтгий 10 орны нэг болжээ. Газарзүйн байрлалын хувьд дэлхийн дулаарлын нөлөөнд нэн түргүүнд өртөх магадлалтай байгаа юм. Бүс нутагтаа агаарын чийгшил харьцангуй багатай, далайн чийглэг уур амьсгалаас уулсаар халхлагдсан тул үүлгүй өдрийн тоог нэмэгдүүлж, хур борооны хэмжээг багасган, халуун хуурай болох нөхцөлийг жилийн турш бүрдүүлдэг байна. Монгол оны агаарын дундаж температур 1940-2015 онд 2.24 хэмээр нэмэгдэж, хүйтэн өдрүүдийн тоо цөөрч, халуун өдрүүдийн тоо нэмэгджээ. Энэ хугацаанд мөн жилийн дундаж хур тунадас 7 хувиар буурч, өвөл орох цасны хэмжээ нэмэгдсэн байна. (Climate Change, Nutrition and Mongolia: A Risk Profile)
Монгол дахь Хүүхдийг Ивээх Сан БНСУ-ын Хүүхдийг Ивээх Сангийн санхүүжилтээр “Ойн төгөл бүтээгч хүүхдүүд” (My Forest Child) төслийг 2024-2027 онд Улаанбаатар хотын Налайх дүүрэгт хэрэгжүүлнэ. Төслийн нээлт 2024 оны 8 дугаар сарын 22-нд Налайх дүүрэгт болж, БНСУ-ын Хүүхдийг Ивээх Сангийн Удирдах зөвлөлийн дарга Уу Жүн, хүндэт ерөнхийлөгч Ким Нубу, гишүүн Ким Ын Жон, И Сэ Хүн, Им Жон Ги, Чу Ёнг Ил , аудитор Пэ Хуа Жү, Ким Уг Жин, БНСУ-ын Хүүхдийг Ивээх Сангийн Олон улсын стратегийн захирал И Чэ Гуан, Стратегийн багийн удирдагч И Вон Хён, Байгаль орчны багийн удирдагч Чэ Ын Жи, Монгол дахь Хүүхдийг Ивээх Сангийн удирдлага, ажилтнууд, Налайх дүүргийн Засаг дарга, Тамгын газрын төлөөллүүд оролцлоо.
Хүүхдийг Ивээх Сангийн Монгол дахь Хөтөлбөрийн менежер, суурин төлөөлөгч Л.Баян-Алтай төслийг нээж хэлсэн үгэндээ “Энэхүү төсөл Хүүхдийг Ивээх Сангийн хувьд уур амьсгалын өөрчлөлтийг сааруулах чиглэлээр хэрэгжүүлж байгаа анхны төсөл юм. Төслийн үйл ажиллагаа нь Налайх дүүргийн хүүхэд, залуучууд, иргэдийн оролцоонд тулгуурлана. Тэдэнд мод тарих, ургуулах мэдлэг чадвар олгоно. Мөн Налайх дүүргээс 4 сургууль сонгож, хүүхдүүдэд уур амьсгалын өөрчлөлтийг сааруулах мэдлэг, мэдээлэл олгох сургалтууд зохион байгуулж, эко клубууд байгуулах юм. Монгол Улсад уур амьсгалын өөрчлөлт эрчимтэй явагдаж байгаа өнөө үед энэ төсөл чухал. Төслийг санхүүжүүлж байгаа БНСУ-ын Хүүхдийг Ивээх Сангийнханд өөрийнхөө болон байгууллагынхаа зүгээс талархал илэрхийлье” хэмээн дурдлаа.
БНСУ-ын Хүүхдийг Ивээх Сангийн Удирдах зөвлөлийн дарга Уу Жүн нээлтийн үеэр хэлсэн үгэндээ “Манайх хүүхдийн төлөө үйл ажиллагаа явуулдаг байгууллага ч шинээр хэрэгжүүлэх төсөл байгаль орчны чиглэлийн үйл ажиллагаа хэрэгжүүлнэ. Хүүхдээ хамгаална гэдэг нь байгаль орчноо хамгаална гэсэн үг. Энэ төслийг Налайх дүүргийн хүүхэд, залуус, иргэд хамтран хэрэгжүүлж, ногоон байгууламжаас гадна ирээдүйд илүү ая тухтай орчинд амьдрах боломж бүрдүүлнэ. Бид хүүхэд байхдаа жил бүр ууланд очиж мод тарьдаг байсан. Тэр үеэс хойш Солонгос улс маш их ой модтой болж, одоо дахин тарих шаардлагагүй болсон. Хүүхэд байхад мод тарих үед бороо орвол их баярлаж, алгаа ташдаг байлаа. Өнөөдөр мод тарих газарт бороо орж байгаа нь баяртай үйл явдал юм. Өнөөдөр тарьсан мод цаашдаа ой болохыг ерөөе” гэж онцлов.
Улаанбаатар хотын Налайх дүүргийн Засаг дарга Х.Анхбаяр “Уур амьсгалын өөрчлөлтийг сааруулах, бууруулахад та бүхэнтэй хамтран ажиллах болсондоо Налайх дүүргийнхэн баяртай байна. Уур амьсгалын өөрчлөлтийн талаарх хүүхэд, залуучуудын мэдлэг, хандлагыг өөрчлөхөд хамгийн тэргүүнд анхаарах ёстой. Хүүхэд, залуучуудыг дэмжсэн, оролцоонд нь тулгуурласан томоохон төсөл дүүрэгт маань хэрэгжих гэж байгаад баяртай байна. Төслийг амжилттай хэрэгжүүлэхэд бүх талаар дэмжин, туслах болно” гэж хэлэв.
Энэхүү төсөл нь Налайх дүүрэгт ойн төгөл байгуулах, ногоон байгууламжийн хэмжээг нэмэгдүүлж, уур амьсгалын өөрчлөлтийг бууруулахад дэмжлэг үзүүлэх зорилготой. Мөн Налайх дүүргийн сургууль, коллеж, МСҮТ-үүдийн суралцагчдын экологийн боловсролыг дээшлүүлэх, идэвх оролцоог нэмэгдүүлэх, мөн дүүргийн иргэдэд мод тарих чиглэлээр мэдлэг олгох юм.
БНСУ-ын Хүүхдийг Ивээх Сангийн Удирдах зөвлөлийн гишүүд 2024 оны 8 дугаар сарын 18-23-нд Монгол Улсад ажиллаж, Монгол дахь Хүүхдийг Ивээх Сангийн удирдлага, ажилтнуудтай уулзаж, цаашдын зорилго, бодлого төлөвлөгөөтэй танилцсан юм. Түүнчлэн хэрэгжүүлж байгаа төслүүдийн оролцогчид болон үр шим хүртэгчдийн төлөөллүүдтэй уулзаж, тэгш хамруулах, хүүхэд хамгаалал, хувь хүний ур чадвар, энтрепренершип боловсрол олгох төсөл хэрэгжиж байгаа сургуулиудын багш ажилтан, сурагчидтай уулзлаа. Мөн ган зуд, шороон шуурга зэрэг байгалийн гамшигт нэрвэгдсэн малчид, орон нутгийн иргэд, захиргааны удирдлага, ажилтнуудтай уулзаж, уур амьсгалын өөрчлөлтийн талаар ойлголт, мэдлэг авлаа.
