ESEL хөтөлбөрийн чиглүүлэгч, энтрепренер клубийн зөвлөх
-Хосолсон хөтөлбөрийн багш хүүхэд, залуусыг хамтад нь чиглүүлж, сургадаг-
Сүхбаатар аймгийн Баяндэлгэр сумын Ерөнхий боловсролын сургууль бол төгсөгчдийнхөө сургалтын амжилтаар аймагтаа тэргүүлэгчдийн нэг. Харин суралцагчид болон төгсөгч залуусын ур чадварыг зах зээлтэй холбох эрмүүн хүсэлтэй багшийн нэг бол тус сургуулийн багш, ESEL хөтөлбөрийн танхимын болон хосолсон хөтөлбөрийн чиглүүлэгч Ш.Болор-Эрдэнэ юм. Тэрээр сургуульдаа 23 дахь жилдээ технологийн багшаар ажиллаж байна. Түүний хувьд алслагдсан хөдөө орон нутгийн хүүхэд, залуус боломжоо ашиглаж, хил хязгаар үл харгалзан хөгжих боломжтой гэж үздэг. Аливаа боломжийг туршиж, өөрсдийн чадах зүйлсийг олж, мэдэхэд багшийн ухаалаг чиглүүлэлт, дэмжлэг чухал байдаг ч хөдөө орон нутагт материаллаг нөөц хомс, харилцаа, сэтгэл зүй болон санхүүгийн мэдлэг, мэдээлэл нь ерөнхий боловсролын сургуулийн сургалтын хөтөлбөрт бага тусгагдсан байлаа.
Харин 2020 онд Хүүхдийг Ивээх Сан Сүхбаатар аймагт “Орон нутгийн өсвөр үеийнхэнд хувь хүний ур чадвар, энтрепренершип боловсрол олгох” төсөл хэрэгжүүлж, Баяндэлгэр сум сонгогдсон нь алдагдсан боломжийг нөхөх том орон зай болсон юм.
Энэ бүхэн Ш.Болор-Эрдэнэ багшийн зорилготой нийцэж, төсөлд багш чиглүүлэгч сонгон шалгаруулж байгааг мэдмэгц өөрийн зорилгоо багтаасан эсээ бичиж, сонгон шалгаруулалтад тэнцжээ. Улмаар хөтөлбөрийн чиглүүлэх багш болж, сурагчдад зөөлөн ур чадвар, төсөл бичих арга зүйд суралцуулан, бичил төслийн шалгаруулалтад чиглүүлэн ажиллажээ. Үүний зэрэгцээ ур чадвараа ахиулан Хүүхдийг Ивээх Сангаас Улаанбаатар хотод зохион байгуулсан танхим болон цахим хосолсон хөтөлбөрийн сургагч багш бэлтгэх сургалтад хамрагдаж, малчин залуус болон гэртээ хүүхдээ харж суугаа залуу эцэг, эхчүүдийг хөтөлбөрт чиглүүлэн ажиллав. Хосолсон хөтөлбөрийн багш болсноор түүний оролцоо зөвхөн сургуулийн хүрээнд бус сумын Тамгын газар, төрийн алба, ажил хөдөлмөр эрхлээгүй 14-25 насны залуус, сумын иргэд рүү чиглэж, багийн Засаг дарга нартай хамтран зорилтод бүлгийнхний судалгааг гаргах, тэдэнд хөтөлбөрийн талаарх мэдээлэл хүргэх ажил болон тэлсэн юм.
“Орон нутгийн өсвөр үеийнхэнд хувь хүний ур чадвар, энтрепренершип боловсрол олгох” төслөөс хувь хүний ур чадвар, энтрепренершип боловсрол олгох шинэлэг хэлбэрийн сургалтын хөтөлбөр боловсруулж, орон нутгийн ерөнхий боловсролын сургууль, Насан туршийн боловсролын төвтэй хамтран сургалтаас олж авсан мэдлэг чадвараа бодитоор туршихыг дэмжиж, хүүхэд, залуучуудын боловсруулсан бичил төслийг санхүүжүүлж байна.
Тэрээр “Шинэ хандлага, шинэ ажлыг дэлгэрүүлж, хүүхэд, залуус, ард иргэдэд хүргэнэ гэдэг амаргүй. Өөрийнхөө оролцоо, хандлагаар суралцагчдадаа үлгэрлэж, хүүхдүүдээр дамжуулан олон нийтэд хүргэх нь үр дүнтэй юм билээ” хэмээн ярьж байна. Мөн “2023 оны 10 дугаар сард Улаанбаатар хотод болсон сургалтаар хосолсон сургалтын сургагч багш болсон. Дараа нь 11 дүгээр сард нэг анги нээж, 20 залуутай сургалтаа эхэлсэн. Энэ сургалт хичээлийн агуулга, цаг адил боловч танхим бусаар хичээллэхэд залуус бүрт таблет, бас багшид таблет өгч, залуусыг суралцах хугацаанд датагаар хангаж, хөдөө сүлжээгүй байсан ч таблет дээрээсээ хичээлээ үзэж боломжтой байлаа. Эдгээр 20 залуусаас сүлжээнд холбогдож чаддаггүй 2 сурагч байсан ч хичээлээ үзээд дараа нь сүлжээнд орохоороо эсвэл хийснээ хүнээр хэлүүлж байсан. Насанд хүрэгчид болохоор сурагчдаас ялгаатай нь үзэж судласан зүйлээ таблет дээрээ даалгавраа хийж илгээх, багаараа хамтарч ажиллахад хурд сэтгэхүй нь илүү, хурдан шаламгай байсан нь багш, залууст хичээлээ үзэж дуусах, төслөө бичих, хэрэгжүүлэхэд дөхөм байсан” гэсэн юм.
Түүний хувьд сургалтаа явуулж, бичил төслөө чиглүүлнэ, хамтрагч талуудтай мэдээлэл солилцож, дараагийн ажлын төлөвлөгөө боловсруулна, зорилтот бүлгийнхэнд мэдээлэл өгөхийн зэрэгцээ Хүүхдийг Ивээх Сангаас заавар дэмжлэг авч хөтөлбөрөө нутагшуулна. Энэ бүгдийн хажуугаар үндсэн ажлаа ч амжуулна. Сумандаа анхны ESEL хөтөлбөрийн багшаар ажиллаж эхэлснээс хойш 48 хүүхэд, залуусыг хөтөлбөрт амжилттай суралцуулж, төслийн хаалтын жил 24 суралцагчийг чиглүүлэн ажилласаар байгаа аж. Түүний төгсгөсөн суралцагчдаас 15 суралцагч 4 баг болж бичил төслийн уралдаанд шалгарч, тэрээр “Бяцхан туслагч”, “Суран эдлэл”, “Урлахуй”, “Эко саван” төслийг удирдан чиглүүлж байна. Мөн тэрээр сургууль дээр байгуулагдсан хүүхдийн оролцооны Энтрепренер клубийн зөвлөх багшаар ажиллаж, энтрепренер үзэл санааг орон нутагтаа түгээхэд хувь нэмрээ оруулсаар байна.
ESEL хөтөлбөрийн чиглүүлэгч багшаар ажилласнаар сурагчдадаа хөгжүүлэхэд харилцаа хандлага, сурагчдын ялгаатай байдлыг ажиглан хэрхэн хандах арга зүйд суралцаж, сурагч бүрийг нээлттэй, аливаад санаачилгатай болгоход анхаарч ажилласан нь үр дүнгээ өгсөн гэнэ. Түүнчлэн хичээлдээ ESEL сургалтын арга зүйгээс ашиглаж байгаа нь сурагчид багшдаа итгэх итгэл, хүүхэд сурах эрмэлзэл нэмэгдэж байгаа нь ажиглагджээ.
Ш.Болор-Эрдэнэ “Төсөл хэрэгжихээс өмнө зөвхөн хичээлээ цагт нь заагаад явж байлаа. Төслийн нэг хэсэг болсноор хувь хүний талаасаа илүү олон зүйлийг амжуулж сурлаа. Төгсөгчдийн маань хувьд хүнтэй харилцахдаа нээлттэй болж, харилцааны ур чадвар, аливаад санаачилгатай байх чадварт суралцаж, орон нутгийнхан болон хүүхэд, залуус төслийн давуу талыг олж харж байгаад баяртай байдаг. Өмнө нь өөрөө төсөл хөтөлбөрт багшаар хамрагдаж байсан ч одоогийн төсөл шиг нас насны хүүхдүүдтэй ажиллаж байгаагүй. Энэ төсөлд хамрагдсанаар суралцагчид төдийгүй би өөрөө ч шинэ санааг үргэлж эрэлхийлдэг болсон. Хамт олон маань хүртэл шинэ санааны дээжээсээ хуваалцаж дэмжиж ажилладаг болсон нь төслийн үр шим, соёл манай сургуульд нутагшиж байгааг харуулж байна” гэлээ.