Эцэг эх, асран хамгаалагчдын зөвлөлийнхөн шинэлэг бүтээлч аргад суралцав
Хүүхдийг Ивээх Сангийн “Сургуультай хамтран хүүхэд хамгааллыг сайжруулах нь” төслөөс зорилтот сургуулиудын эцэг эх, асран хамгаалагчдын зөвлөлийн гишүүдэд “Sprint innovation” сургалтыг 2025 оны 3 дугаар сарын 20-нд Улаанбаатар хотод зохион байгууллаа. Энэхүү сургалт нь эцэг эх, асран хамгаалагчдын зөвлөлөөс сургуулийнхаа нийт эцэг эх, асран хамгаалагчдад хүүхэд хамгааллын чиглэлээр зохион байгуулах үйл ажиллагаагаа тодорхойлон, шинэлэг бүтээлч аргаар хүргэхэд эцэг эхийн зөвлөлийн гишүүдийг сургах зорилготой байв.
“Sprint innovation” сургалт “Оюуны довтолгоо1-асуудлаа тодорхойлох, Оюуны довтолгоо2-шийдлээ тодорхойлох, Оюуны довтолгоо3-шийдлээ хэрэгжүүлэхээр нарийвчлан боловсруулах” зэрэг сэдвүүдээр оролцоонд тулгуурлан бүлгээр хэлэлцэх, онол, дадлага хослуулах хэлбэрээр явагдсан юм. Оролцогчид бүлэгт хуваагдаж, хэрэгжүүлэхээр тодорхойлсон үйл ажиллагааны төслөө сургалтын төгсгөлд танилцуулан, хэлэлцүүллээ.
Нийслэлийн ерөнхий боловсролын 73-р сургуулийн 5д ангийн эцэг эхийн зөвлөлийн дарга Б.Нямдаваа “Сургалт үр өгөөжтэй байлаа. Сургуулийн эцэг эхийн зөвлөл 15 гишүүнтэй. Өмнө нь “Сайн эцэг эх” төсөл хэрэгжүүлж байсан. Энэ удаа сургалтаас мэдлэг чадвар эзэмшиж, илүү сайн төсөл бичиж, хэрэгжүүлэхээр төлөвлөж байна” хэмээн ярилаа.
Мөн нийслэлийн ерөнхий боловсролын 75-р сургуулийн эцэг эхийн зөвлөлийн гишүүн Н.Түвшинсайхан “Сургуулийн орчин дахь хүүхэд хамгаалал бол зөвхөн Монголын асуудал биш дэлхий нийтийнх. Бид сайн орны туршлага, сайн жишгээс суралцах, өөрсдийн сургууль дээр хэрэгжүүлэх ёстой. Сайн туршлагыг суурьшуулах, авч үлдэх үйл явц төслийн хүрээнд хэрэгжиж байна. Энэ удаагийн сургалтад Улаанбаатар хотын зорилтот бүх сургуулийн эцэг эхийн зөвлөл хамрагдлаа” гэв.
Сургалтад Улаанбаатар хотын төслийн зорилтот 10 сургууль бүрийн эцэг эх, асран хамгаалагчдын зөвлөлийн дөрөв, сургуулийн багш ажилтан нэг, Хүүхдийг Ивээх Сангийн ажилтнууд зэрэг нийт 50 гаруй хүн оролцов.
Тус үйл ажиллагаанд хамрагдсан эцэг эх, асран хамгаалагчдын зөвлөлийн гишүүд, сургууль тус бүрээр хүүхэд хамгааллын чиглэлээр төсөл санаачлан хэрэгжүүлэх бөгөөд тухайн төслийг хэрэгжүүлэхэд Хүүхдийг Ивээх Сангаас санхүүгийн дэмжлэг үзүүлэх юм.
Дашрамд өгүүлэхэд Хүүхдийг Ивээх Сан “Сургуультай хамтран хүүхэд хамгааллыг сайжруулах нь” төслийг Улаанбаатар хот, Говь-Алтай, Ховд аймагт хэрэгжүүлж байгаа билээ. Төсөлд Улаанбаатар хотын Хан-Уул, Баянгол, Чингэлтэй, Сүхбаатар, Баянзүрх дүүрэг болон Говь-Алтай, Ховд аймгийн нийт 14 сургууль, 14 хамтарсан баг хамрагдаж байна.