Хамтран ажиллах санамж бичиг байгуулав
Монгол дахь Хүүхдийг Ивээх Сан, Хөгжлийн бэрхшээлтэй хүүхдийн сэргээн засах хөгжлийн төвтэй хамтран ажиллах санамж бичиг байгуулав. Санамж бичигт Хүүхдийг Ивээх Сангийн Монгол дахь Суурин төлөөлөгч Л.Баян-Алтай, Хөгжлийн бэрхшээлтэй хүүхдийн сэргээн засах хөгжлийн төвийн дарга Г.Ууганцэцэг нар 2025 оны 3 дугаар сарын 25-нд гарын үсэг зурлаа.
Энэхүү санамж бичгийн хүрээнд талууд нь хүүхдийн эсэн мэнд амьдрах, сурах, хөгжих, хамгаалуулах эрхийн хэрэгжилтийг дэмжих чиглэлээр хамтран ажиллахаар тохиролцов. Хүүхдийг Ивээх Сангийн Монгол дахь Суурин төлөөлөгч Л.Баян-Алтай тус байгууллага хүүхэд бүр эсэн мэнд амьдрах, хамгаалуулах, хөгжих, оролцох эрхээ эдэлдэг ертөнцийг бий болгох алсын хараатай, хүүхдэд эерэг нөлөө үзүүлж, тэдний амьдралд урт хугацааны өөрчлөлт авчрах эрхэм зорилготой, хүүхэд хамгаалал, хүүхдийн эрхийн засаглал, боловсрол, хүүхдийн ядуурлыг бууруулах, эрүүл мэнд, хүмүүнлэгийн яаралтай тусламжийн чиглэлээр үйл ажиллагаа явуулдаг тухайгаа танилцуулав. Мөн Хүүхдийг Ивээх Сангийн хэрэгжүүлж буй “Тэгш хүртээмжтэй, цогц үйлчилгээгээр бага насны хүүхдийн хөгжлийг дэмжих нь” төслийн хүрээнд хөгжлийн бэрхшээлтэй хүүхдийн хэл засал, сэргээн засах, хөдөлгөөн засал, хөдөлмөр засал гэх мэт холбогдох сургалтуудыг тус төвтэй хамтран явуулах, хүүхэд хамгааллын чиглэлээр хамтран ажиллах боломж бүрдэж байгаа талаар ярилаа.
Хөгжлийн бэрхшээлтэй хүүхдийн сэргээн засах хөгжлийн төвийн дарга Г.Ууганцэцэг Хүүхдийг Ивээх Сангийн төлөөллүүдэд төвөө танилцуулав. Тус төв хөгжлийн бэрхшээлтэй хүүхдэд дэлхийн жишигт хүрсэн эрүүл мэнд, боловсрол, нийгмийн сэргээн засах тусламж, үйлчилгээг тав тухтай орчинд үзүүлэх зорилготой ажилладаг байна. Өнөөдөр 160 орчим ажилтантай үйл ажиллагаа явуулдаг бөгөөд хөгжлийн бэрхшээлтэй хүүхдүүдэд хөдөлмөр, хөдөлгөөн, хэл, хөгжим засал, усан, спорт, физик эмчилгээ болон нийгмийн хөгжил, туслах захиалгын үйлчилгээ үзүүлдэг байна. 2019 онд байгуулагдсан цагаасаа 2024 оныг дуусах хүртэлх хугацаанд 34,581 хүүхдэд амбулаторийн үзлэг хийж, 6,670 хүүхдийг хэвтэн эмчлүүлж, 4,736 хүүхдэд өдрийн эмчилгээ хийжээ.