“Ойн төгөл бүтээгч хүүхдүүд” төсөл эко клубүүддээ дэмжлэг үзүүллээ

Хүүхдийг Ивээх Сан (ХИС)-гийн “Ойн төгөл бүтээгч хүүхдүүд” төслөөс нийслэлийн Налайх дүүргийн сургуулиудын Эко клубүүдийн үйл ажиллагаанд дэмжлэг үзүүллээ. Уг төслийн хүрээнд 2025 оны 3 дугаар сарын 25-ны өдөр уур амьсгалын өөрчлөлтийн элч сургалтын үеэр Налайх дүүргийн ерөнхий боловсролын таван сургууль, Политехникийн коллежийн Эко клубийн удирдагч багш нарт хүүхдүүдийнхээ байгаль хамгаалал, экологийн боловсролд цаг зав, зүрх сэтгэлээ зориулан ажиллаж байгаад талархан клубийн үйл ажиллагаанд шаардлагатай сургалтын материал, хэрэглэгдэхүүн гардуулж өгөв. Мөн төслөөс эко клубийн сурагчдын санаачилгаар экологийн боловсрол, уур амьсгалын өөрчлөлтийн мэдлэг түгээх зорилготой бичил төслийг 6 сургууль дээр түшиглэн хэрэгжүүлэхээр ажиллаж байгаа тухай оролцогчдод мэдээлэл өгсөн билээ.

 

 

Өнгөрсөн онд тус төслөөс Налайх дүүргийн 50 иргэнийг уур амьсгалын өөрчлөлтийн сургагч багшаар бэлтгэж, бэлтгэгдсэн Сургагч багш нар олон нийт, хүүхэд багачуудад чиглэсэн цуврал сургалтуудыг дараах сэдвүүдээр зохион байгуулж байна.

  • Уур амьсгалын өөрчлөлт, дасан зохицох арга зам
  • Байгальд ээлтэй амьдрах дадал хэвшүүлэх
  • Хог хаягдлын менежмент, ногоон бүс бүрдүүлэх
  • Мод, сөөг тарих аргачлал

Одоогоор нийслэлийн Налайх дүүргийн Хот тохижилт, нийтийн үйлчилгээний хэлтэс, Ахмадын хороотой хамтран 250 иргэн, ерөнхий боловсролын сургуулийн  190 гаруй сурагч сургалтад хамрагдсан бөгөөд энэ жилийн эцэс гэхэд 1500 орчим иргэнд дээрх сургалтуудыг хүргэхээр төлөвлөсөн юм.

Сургалтын нээлтэд Налайх дүүргийн Засаг даргын Байгаль орчин, ногоон хөгжлийн зөвлөх Т.Батсүх оролцож, “Уур амьсгалын өөрчлөлттэй тэмцэхэд хүн бүрийн оролцоо чухал. Энэхүү төсөл иргэдийн идэвхтэй хамтын ажиллагааг нэмэгдүүлэх үр өгөөжтэй алхам юм” гэж онцолсон бол.

Хүүхдийг Ивээх Сангийн Монгол дахь Суурин төлөөлөгч Л.Баян-Алтай Налайхын иргэд, удирдлагууд энэхүү төслийг дэмжин, идэвхтэй оролцож байгаад талархал илэрхийлээд, “Энэ төсөл нь  зөвхөн 5 га-д төгөл байгуулах  төдийгүй, иргэдийн амьдрах орчныг сайжруулах, уур амьсгалын өөрчлөлт, байгаль хамгааллын мэдлэг, чадвартай болгохоор зорьж байна” гэлээ.

📌 Холбогдох мэдээлэл: Хэрэв та Налайх дүүргийн оршин суугч бол манай дараагийн сургалтад 99785009 утсаар холбогдож, бүртгүүлэх боломжтой.