Хүүхдээ хайрлах ухаарал өгсөн “Гэрэлт самбар”
Нийслэлийн 73 дугаар сургууль бол Хүүхдийг Ивээх Сангийн “Сургуультай хамтран хүүхэд хамгааллыг сайжруулах нь” төсөл хэрэгжиж буй газруудын нэг. Тус сургуулийн эцэг, эхийн зөвлөлийнхөн төслийн хүрээнд нэгэн ажил зохион байгуулсан нь “Гэрэлт самбар” төсөл байлаа.
Төслийн санаагаа хэрхэн олсон талаараа тус сургуулийн эцэг, эхийн зөвлөлийн гишүүн, 5-р ангийн эцэг, эхийн зөвлөлийн дарга Б.Нямдаваа ийнхүү ярилаа. Тэрээр “Манай бага охин сургуулийнхаа волейболын секцэд явдаг. Өглөө 6.00 цагт бэлэн байх учраас 5 цаг 50 минутад очих ёстой. Өвлийн улиралд өглөө харанхуй байдаг. Сургуулийн үүдний хэсэгт гэрэл илүү нэмэх хүсэлтэй явдаг байсан юм. Энэ үед төсөлд оролцох боломж гарснаар санаагаа бодит ажил болголоо. 2024-2025 оны хичээлийн жилд манай сургуулийн эцэг эхийн зөвлөл шинэчлэгдэн 13 хүний бүрэлдэхүүнтэй байгуулагдсан. Сургуультай хамтран хүүхэд хамгааллыг сайжруулах нь төслийн хүрээнд сургуулийн ажлын хэсэгтэй эцэг эхийн зөвлөл маань нягт хамтран ажиллалаа. 14 сургуулийн эцэг эхийн зөвлөлийн дунд зарласан бичил төслийн уралдаанд оролцож хоёр удаа санхүүгийн дэмжлэг авсан. Төслөө сайн бичиж, санхүүжилт авч сургуульдаа заавал хэрэгжүүлнэ гэж зорьсон” хэмээн өгүүлэв. “Гэрэлт самбар” төслийн баг зургаан гишүүнтэй, нас насны хүмүүсийн төлөөллөөс бүрдэнэ. Тэдний хувьд сургуулийнхаа хүүхдүүд, эцэг, эхчүүдэд үр бүтээлтэй, шинэлэг зүйл бүтээж өгөх зорилготой байлаа. Тиймээс самбараа хүмүүст өдөр тутамдаа дадал болгох хүүхдээ “Өдөр бүр тэвэрье”, “Үргэлж сонсъё”, “Дандаа ярилцъя” гурван уриа үгтэй хэвлэж, мөн жижиг хувилбараар хөргөгчийн наалт болгожээ. Эцэг эх, асран хамгаалагчид тэдний ажлыг сайнаар хүлээж авч, талархлаа илэрхийлэн, амжилт хүсэж байв.
Б.Нямдаваагийн хувьд “Сургуультай хамтран хүүхэд хамгааллыг сайжруулах нь” төсөл хэрэгжсэн байртай байгаа бөгөөд “Сайн эцэг эх” сургалтын чиглүүлэгч болж, бусад эцэг эхчүүдэд сургалт мэдээлэл өгч ажиллажээ.Эдгээр сургалтуудад нийт 800 эцэг, эх хамрагджээ. Эцэг эхчүүдэд сургуулиас зохион байгуулж буй сургалт, үйл ажиллагаанд дахин оролцох хүсэл төрүүлдэг хэмээлээ. Сургалтуудаас хүүхэдтэйгээ хэрхэн харилцах, санаа бодлыг сонсох, ойлгох, мэдрэх болон өөрийгөө ойлгуулах гээд олон зүйлийг мэдэж авсандаа баяртай байна” гэж тодотгосон юм.
Түүний хувьд “Хүнлэг байя” аяны хүрээнд зохион байгуулсан мэддэг байя, мэдээлдэг байя сургалтаас маш хэрэгтэй тест мэдэж авчээ. Энэ бол хүмүүжлийн тэнцвэрийн хүрдний тест юм. Түүнийгээ 5-р ангийн хүүхдүүд, эцэг, эхчүүдэд танилцуулж, хүүхдүүдээ хэр сайн мэддэг вэ, хүүхдүүд эцэг, эхчүүдийг юу гэж дүгнэдэг, тэднээс юу хүсэж байгааг олж мэдсэн байна. Ингэснээр гарц гаргалгаа бий болгож, ойлголцолд хүрэх хамгийн зөв арга замаа олжээ. Хүүхдийг Ивээх Сангаас анги бүлэг бүрийн эцэг, эхийн зөвлөлийн дарга нарт сургалт, нөлөөллийн үйл ажиллагааг тогтмол зохион байгуулдаг аж. 73 дугаар сургуулийн сэтгэл зүйч Р.Гэрэлчимэг, хэлэхдээ “Бидэнтэй байнга хамтарч идэвхтэй ажилладаг эцэг эхийн зөвлөлийн тэргүүлэгч гишүүдийн нэг юм. Ямар нэгэн сургалт зөвлөгөөнд маш идэвхтэй оролцож, бусад эцэг эхийг манлайлдаг. Түүний хандлага нь хүүхдийн төлөө, сайн ээж гэдэг нь мэдрэгддэг. Түүнээс хариуцлага, бүтээлч байдлыг олж хардаг” хэмээн ярилаа.
Сургуулийн эцэг эхийн зөвлөлийн гишүүд тогтсон өдөр цагт нийгмийн ажилтны өрөөнд цугларч уулзалдаж, үйл ажиллагааны төлөвлөгөөтэй болсон байна.. Аливаа ажилд манлайлал хамгийн чухал. Б.Нямдаваагийн манлайллаар эцэг эхийн зөвлөлийн үйл ажиллагаа идэвх, санаачилгатай ажиллаж байгаа юм. Тэдний явуулж байгаа үйл ажиллагаа сургууль, хүүхдүүдэд өгөөжтэй, үлдэцтэй болдог. Эцэг эхчүүд бие биедээ нөлөөлөх нь хамгийн чухал гэдгийг түүний охиныхоо ангид хэрэгжүүлсэн “Тэнцвэрийн хүрд” оношилгооноос харж болохоор. Бас сургуулийн орчинг багш, ажилчдаас илүү хүүхдээ хүргэж өгдөг ээжийн нүдээр олж харан бодит ажил болгож чаддаг юм. Сургуулийн ажилтнуудын хувьд эцэг эхчүүдийн санал, санаачилга маш чухал.
Монгол дахь Хүүхдийг Ивээх Сан 2023 оноос “Сургуультай хамтран хүүхэд хамгааллыг сайжруулах нь” төслийг Хонконгийн Хүүхдийг Ивээх Сангийн санхүүжилтээр Улаанбаатар хотын Хан-Уул, Баянгол, Чингэлтэй, Сүхбаатар, Баянзүрх дүүрэг болон Говь-Алтай, Ховд аймгийн нийт 14 сургууль, 14 хамтарсан багт хэрэгжүүлж байна. Энэхүү төслөөр зорилтот газруудад сургуулийн багш ажилтнууд, эцэг эх/асран хамгаалагчид, сурагчид болон хамтарсан багуудыг хамруулан сургуульд суурилсан хүүхэд хамгааллын механизмыг хөгжүүлснээр үр дүнтэй урьдчилан сэргийлэх, эрт илрүүлэх, хариу арга хэмжээ авах хамтын ажиллагааны загвар бий болгох зорилготой юм.