Говьсүмбэрийнхэн аймгаараа хичээдэг
Хүүхдийг Ивээх Сан (ХИС)-гаас хэрэгжүүлж буй “Орон нутгийн өсвөр үеийнхэнд хувь хүний ур чадвар, энтерпренершип боловсрол олгох” төслөө хэрэгжүүлж эхлэхэд, бидэнд тулгарсан эхний асуудал бол зөвхөн сургуулийн үйл ажиллагаа байх уу эсвэл тал, талаасаа оролцсон нийтийн хүчин чармайлт байх нь илүү үр дүнтэй юу гэсэн салаа асуулт байсан юм. Мэдээж шууд хамааралтай, чиг үүргийн, цөөхөн хүмүүстэй хамтраад ажиллавал хялбар, гэхдээ төслийнхөө зорилгыг харахаар өргөн хүрээний хамтын ажиллагаатай байх нь чухал байлаа. Ингээд Төслийн аймгийн зөвлөл (ТАЗ), Төслийн сумын зөвлөл (ТСЗ) байгуулж, зөвлөлийн үйл ажиллагаанд баримтлах жишиг журам гарган хэрэгжүүлсэн нь оновчтой шийдэл болсон.
2020 оны 2 сарын 6-нд ХИС, Аймгийн Засаг даргатай төсөл хэрэгжүүлэх хамтын ажиллагааны санамж бичиг байгуулан, Аймгийн Засаг дарга Г.Батсуурь төслийг талархан хүлээн авч, аймгийнхаа нэг үндсэн үйл ажиллагаа болгон хэрэгжүүлэхээ илэрхийлж байлаа. Төд удалгүй Засаг даргын захирамж гарч, ТАЗ-ыг 11 хүний бүрэлдэхүүнтэйгээр Аймгийн Засаг даргын Тамгын газрын дарга Д.Содномоор ахлуулан байгуулсан. Зөвлөлд холбогдох газар, хэлтсийн дарга нар, Монголын худалдаа, аж үйлдвэрийн танхимын аймаг дахь салбарын дарга, Политехник коллежийн захирал, Насан туршийн боловсролын багш нарыг багтаасан нь төслийг тэдгээр байгууллагуудын үндсэн үйл ажиллагаатай уялдуулах боломжийг олгосон. Тухайлбал аймагт Насан туршийн боловсролын төв байгуулагдаагүй байсныг тус зөвлөлөөр хэлэлцэж, аймгийн иргэдийн хуралд танилцуулан шинээр төв байгуулж, орон тоо, төсөв хөрөнгө, байрны асуудлыг шийдсэн нь төслийн хэрэгжилтэд төдийгүй орон нутгийн залуучуудад хувь нэмрээ өгч байна.
ТАЗ-ийн гишүүд төслийн үйл ажиллагааг салбарын бодлого, үйл ажиллагаатай уялдуулахын зэрэгцээ, хүүхэд, залуучуудын санаачилсан үйл ажиллагааг тухайлан дэмждэг туршлага бий болж, өргөжиж байна. Зөвхөн ТАЗ-ийн гишүүд гэлтгүй Аймгийн Засаг дарга, Иргэдийн хурлын дарга нарыг оролцуулан бичил төсөл хэрэгжүүлж байгаа сургуулийн гаднах залуучуудын нэг, нэг багийг хариуцан ментороор ажиллаж, дэмжлэг үзүүлэх болсон. Сүмбэр сумын 5-р сургуулийн Энтрепренер клубийн сурагчдын санаачилсан “Гэрэл түгээе” аяны хүрээнд орон нутгийн байгууллагууд, багийн иргэд, айл өрхийн дэмжлэгтэйгээр хөрөнгө босгон, орон сууцуудын орцыг гэрэлтэй болгох ажлыг хүүхдүүд өөрсдөө санаачлан, зохион байгуулсан нь олон нийтийн талархлыг хүлээсэн. Түүнчлэн энэхүү сурагчдын санаачилгыг сумын ЗДТГ талархалтай хүлээн авч Сөх-ийн холбоотой хамтран бүх айл өрхийг орцны гэрэлтүүлгийг бүрэн шийдвэрлэхээр төлөвлөөд байгаа аж. Энэ нь хүүхдүүдийн аливаа санаачилгыг төр, захиргааны байгууллагуудаас дэмжээд өгвөл, орон нутгийн зарим асуудлыг шийдвэрлэх гарц, боломж байгааг энэхүү хамтын ажиллагаа харуулж чадсан юм.
ТАЗ-д холбогдох байгууллагуудын дарга нарын гишүүнээр ажилладаг боловч, тухайн байгууллагын ажилтнууд үйл ажиллагаанд нь идэвхтэй оролцдог. Дарга нь өөр ажилтай завгүй бол өөр ажилтан зөвлөлийн хуралд орлож оролцох, үндсэн чиг үүрэгтэйгээ уялдуулан ажиллах соёл нутагшиж байна. Хөдөлмөр, халамжийн үйлчилгээний газрын мэргэжилтнүүд бичил төсөл шалгаруулах багт шүүгчээр ажиллахын зэрэгцээ, Политехник коллежийн бичил төсөл хэрэгжүүлж байгаа багийн санаачилсан оюутнуудын цагийн ажлын зуучлалын төвийг дэмжиж орон нутагтаа цагийн ажлын зуучлал хөгжүүлж эхэлсэн. Боловсролын газраас байгууллагуудын удирдлагын шуурхай зөвлөгөөнд Сүмбэр сумын 1-р сургуулийн туршилтаар хэрэгжүүлж буй “Боржигон хөгжлийн төв” сургуульд суурилсан энтерпрайз санаачилгыг танилцуулан, төвийн зохион байгуулж буй сургалтуудад ажилтнаа оролцуулах, төрийн байгууллагуудын сургалтыг тус төвд түрээсээр зохион байгуулах боломжийг бий болгож, улмаар Орон нутгийн хөгжлийн сангаас 36 сая төгрөгөөр төвийн үйл ажиллагаанд хэрэгтэй байсан сургалтын тоног төхөөрөмж, таблет, Боловсролын яамны 79 сая төгрөгийн санхүүжилтийг босгож чадсан нь орон нутгийн хамтын ажиллагааны нэг үр дүн байлаа. Говьсүмбэр аймгийн ЗДТГ-ын дарга, ТАЗ-ийн дарга Д.Содном ТАЗ-ийн ажлаа дүгнэн “Ер нь Монголчууд угийн язгуурын бусадтай нээлттэй харилцах чадвар сул, бүрэг ичимхий хандлагатай улс. Энэхүү зан чанарыг бүрэн эвдэж чадсан төсөл гэж миний хувьд хардаг. Тиймээс энэхүү төслийг төрийн байгууллагууд дэмжиж, төслийн үйл ажиллагаа, аргазүйг орон нутагтаа нутагшуулан авч үлдэх, төслийн тогтвортой байдлыг хангахад манай зөвлөл анхаарлаа хандуулна. Энэ хүрээнд аймаг орон нутгаас дэмжин, тодорхой санхүүжилт, нөхцөл бүрдүүлэх боломжтой” хэмээн ярилаа.
Төслийн аймаг, сумын зөвлөл байгуулан, чиг үүрийг нь тодорхой болгож, гишүүн байгууллагуудын үндсэн үйл ажиллагаатай уялдуулан, хамтын ажиллагаа, оролцоо бий болгосон нь боловсрол, хүүхдийн хөгжлийн төлөө орон нутгаараа нэгдэн ажиллах хандлага төлөвшихөд дэмжлэг болж байна.