Төслийн ахлагч, төслийн сургагч Б.Энхбаатар
Нийслэлийн ерөнхий боловсролын 51 дүгээр сургууль математик-гадаад хэлний төрөлжсөн сургалттай, 1-12 дугаар ангийн 65 бүлэгтэй, 2150 сурагчтай. Тус сургуульд Хүүхдийг Ивээх Сангийн “Сургуультай хамтран хүүхэд хамгааллыг сайжруулах нь” төсөл хэрэгжиж байгаа юм.
Б.Энхбаатар тус сургуулийн ахлах, дунд анги хариуцсан нийгмийн ажилтан. Тэрээр сургуульдаа гурав дахь жилдээ ажиллаж байна. Нийгмийн ажилтан нь сурагчид, тэдний гэр бүлийн гишүүдэд нийгмийн болон сэтгэл зүйн дэмжлэг үзүүлж, хүүхдийн сурлагын амжилт, хүмүүжлийн чанарыг дээшлүүлэх зорилгоор нийгмийн үйлчилгээ, туслалцаа хүргэх үүрэгтэй. Б.Энхбаатар Хүүхдийг Ивээх Сангийн хэрэгжүүлж буй “Сургуультай хамтран хүүхэд хамгааллыг сайжруулах нь” төсөл тус сургуульд хэрэгжиж эхлэхэд анхны сургагч багш нарын нэг болж, одоо төслөө ахлан ажиллаж байгаа юм. Сургуулийн төслийн багийн 10 гишүүний тал нь залуу багш нар байдаг. Тэд өөрсдийн саналаар гишүүдээ бүрдүүлсэн учраас хамтдаа идэвх, санаачилгатай ажилладаг байна. Мөн төслийн үйл ажиллагааг дэмжин ажилладаг 15 хүний бүрэлдэхүүнтэй баг сургуульд байдаг аж. Тэрээр “Энэ төсөл миний ажилд их тус болдог. Нийгмийн ажилтанд хүүхдийн хөгжил, хамгааллын хавтас гэж байдаг. Үүнд өмнө нь цөөн тооны кейс байсан. Одоо эцэг эх, багш нар, сурагч гэсэн гурвалсан ажлууд хийж, 125 хүүхэд, 800 эцэг эхэд сургалт явуулж, нэмж 130 эцэг эхэд сургалт явуулсан байгаа. Ингэж цар хүрээгээ нэмэгдүүлсэн нь төслийн үр дүнг харуулж байна” хэмээн ярилаа. Түүнчлэн багш, ажилтнуудын хүүхэд хамгаалал, хүүхдийн эрхийн мэдлэг, эрсдэлийн үнэлгээ хийх зэрэг олон талын чадвар нэмэгджээ.
Төслийн хүрээнд явагдсан “Би найзаа дэмжинэ” хөтөлбөрт ахлах ангийн сурагчид маш идэвхтэй оролцож, мэдлэг мэдээлэлтэй болсон байна. Ангиудад мэдээллээ нээлттэй хүргэж, сурагчид өөрсдийн хүсэлтээр сургалтад хамрагдаж, чиглүүлэгч болжээ. Чиглүүлэгч хүүхдүүд нийгмийн ажилтны хамт 6-9 дүгээр ангид үе тэнгийнхэндээ “Би найзаа дэмжинэ” сургалтаа явуулж байна. Тэдний хувьд бусдын эрх зөрчигдөж байвал мэдээлэх, найзууддаа туслах зэрэг олон чадварт суралцсан ажээ. Тэдгээр чиглүүлэгч хүүхдүүдийн зарим нь сурагчдын өөрөө удирдах клубт харьяалагддаг. 51 дүгээр сургууль 11 клубтэй. Нэг клуб улиралдаа олон нийтийг хамарсан 1-2 аян тогтмол явуулдаг байна.
Нийслэийн 51 дүгээр сургуулийнхан гадны хүн нэвтрэх үнэмлэх, бүртгэлийг хэвшүүлжээ. Бусад сургуулиуд үүнээс санаа авч, өөрсдийн сургуульдаа хэрэгжүүлж байна. Түүнчлэн хүүхэд хамгааллын мэдээллийн хэлхээг хүүхдүүдэд танилцуулж, анги бүрт байршуулахын зэрэгцээ үүдэнд байршуулсан самбараар хүүхэд хамгааллын мэдээллүүдээ тогтмол явуулах болжээ. Ангийн дүрмийг хэрхэн өөрчилсөн талаараа Б.Энхбаатар “Өмнө нь ангийн дүрэм байсан. Гэхдээ сөрөг утгатай үгс их хэрэглэдэг байж. Тиймээс бусдыг урилсан, буруутгаагүй, эерэг утгатай үг хэрэглэж, бүх анги дүрмээ зохиосон. Ангийн багш нарт энэ талаарх сургалт явуулсан” хэмээн өгүүлэв.
Б.Энхбаатар ширээн дээрээ байгаа “Сургуультай хамтран хүүхэд хамгааллыг сайжруулах нь” төслөөс гаргасан гарын авлагуудыг харуулж, өдөр тутмын ажилдаа ашигладаг талаар ярилээ. Мөн сургуулийнхаа урлагийн заалыг хариуцдаг тул сурагчдыг хөгжүүлэх, хамгаалах чиглэлээр олон үйл ажиллагаа явуулж, сурагчдын санаачилгуудыг дэмждэг тухайгаа тодруулсан юм. Ярилцлагын өмнө сургуулийн эцэг эхийн зөвлөлийн даргатай хийсэн уулзалтаа дуусгаж байсан бол ярилцлагын үеэр төслийн чиглүүлэгчээр бэлтгэгдсэн хүүхдүүд өрөөнд орж ирээд, ажлаа танилцуулахаар бэлтгэж байв. Түүний ажил ч завгүй, тасралтгүй үргэлжилдэг гэдгийг ярианы эхэнд дурдаж байсан билээ.
Хүүхдийг Ивээх Сан 2023 оноос Хүүхдийг Ивээх Сангийн Олон Улсын Эвсэлийн санхүүжилтээр “Сургуультай хамтран хүүхэд хамгааллыг сайжруулах нь” төслийг Улаанбаатар хотын Хан-Уул, Баянгол, Чингэлтэй, Сүхбаатар, Баянзүрх дүүрэг болон Говь-Алтай, Ховд аймгийн 14 сургууль, 14 хамтарсан багт хэрэгжүүлж байна. Төслөөр зорилтот газруудад сургуулийн багш ажилтнууд, эцэг эх/асран хамгаалагчид, сурагчид болон хамтарсан багуудыг хамруулан сургуульд суурилсан хүүхэд хамгааллын механизмыг хөгжүүлснээр үр дүнтэй урьдчилан сэргийлэх, эрт илрүүлэх, хариу арга хэмжээ авах хамтын ажиллагааны загвар бий болгох зорилготой юм.