ESEL хөтөлбөрт хамрагдсан оюутан залуусын уулзалт боллоо
Хүүхдийг Ивээх Сан “Орон нутгийн өсвөр үеийнхэнд хувь хүний ур чадвар, энтрепренершип боловсрол олгох” төслийг Дэлхийн Банкны менежмент, Японы Нийгмийн Хөгжлийн Сангийн буцалтгүй тусламжаар Ховд, Завхан, Өвөрхангай, Говьсүмбэр, Сүхбаатар аймгийн 29 суманд 2019-2025 онд хэрэгжүүлж байна. Төслийн хүрээнд өнгөрсөн хугацаанд нийт 8773 хүүхэд, залуусыг “Энтрепренершипд суурилсан хувь хүний ур чадвар хөгжүүлэх” (ESEL) сургалтад хамруулсан юм. Хүүхдийг Ивээх Сангаас ESEL сургалтын хөтөлбөрт хамрагдсан оюутан залуусын төлөөлөлтэй төслийн үр дүнгийн талаарх хэлэлцүүлгийг 2025 оны 3 дугаар сарын 15-нд Улаанбаатар хотод зохион байгууллаа.
Хүүхдийг Ивээх Сангийн Монгол дахь Суурин төлөөлөгч Л.Баян-Алтай уулзалтыг нээлээ. Тэрээр “Өнгөрсөн хугацаанд олон хүүхэд, залуус төслийн үр өгөөжийг хүртжээ. Өнөөдөр та бүхний дунд сургуульд сурч байхдаа төслийн сургалтаас олж авсан мэдлэг, ур чадвар оюутан болох, дараагийн ажил хөдөлмөр эрхлэхэд хэрхэн нөлөөлсөн талаар ярилцахаар энэ арга хэмжээг зохион байгуулж байна. Тиймээс энэ уулзалтыг үр дүнтэй өнгөрөөж, бүтээлч байхыг хүсье” хэмээн онцлов.
Оюутан залуус “ESEL ур чадвар миний амьдралд” хэлэлцүүлэг явуулж, “ESEL бидний ирээдүйд” бүлгийн ажил хийж, ESEL хөтөлбөр болон бичил төслөөр өөрсдийнхөө ур чадварыг хөгжүүлсэн туршлагаасаа хуваалцаж, санал бодлоо солилцов.
Оролцогч МУИС-ийн оюутан, Сүхбаатар аймаг Мөнххаан сумын ЕБС төгсөгч Э.Нандиншүр “Би ESEL хөтөлбөрийн сургалтаас цагийн менежмент, багаар ажиллах, онол дадлага хослуулах гэсэн гурван ур чадвар олж авсан гэж бодож байгаа. Төсөл бичих хэцүү биш, хэрэгжүүлэхэд хүндрэлтэй зүйлүүд байсан юм. Гэхдээ манай төсөл маш амжилттай болсон. Төрөл бүрийн тэтгэлэгт хувийн танилцуулгаа явуулахад Хүүхдийг Ивээх Сангийн төсөлд хамрагдсан мэдээлэл эерэгээр нөлөөлдөг. Баярлалаа” хэмээн хэллээ. Харин ШУТИС-ийн оюутан, Завхан аймаг Түдэвтэй сумын ЕБС төгсөгч А.Мөнхбаяр “Би бүрэг ичимхий хүүхэд байсан. Одоо гурван оюутны зөвлөлд зэрэг ажиллаад явж байна. Эндээс харахад төслөөр өөрийгөө нээж, бусадтай илүү нээлттэй харилцдаг болсон. Ямар аргаар, ямар ажил хийхээ сайн мэддэг болсон гэж боддог” гэж ярив.
Уулзалтад оролцсон оюутан залуус хоорондоо танилцан, цаашид холбоо тогтоож, хамтран ажиллах, санал бодлоо солилцох, туршлагаа хуваалцахаар ярилцжээ.