Туршлага солилцох уулзалт боллоо
Хүүхдийг Ивээх Сан “Тэгш хүртээмжтэй, цогц үйлчилгээгээр бага насны хүүхдийн хөгжлийг дэмжих нь” төслийг Япон улсын Гадаад хэргийн яамны санхүүжилтээр 2024 оны 3 дугаар сараас 2025 оны 3 дугаар сар хүртэлх хугацаанд амжилттай хэрэгжүүллээ. Төслөөс эхний жилийнхээ үр дүнг танилцуулах, хуримтлуулсан туршлагаа хуваалцах, цаашдын алхмын талаар саналаа солилцох зорилгоор туршлага солилцох уулзалтыг 2025 оны 3 дугаар сарын 21-нд Холидэй Инн зочид буудлын хурлын танхимд зохион байгуулсан юм. Хүүхдийг Ивээх Сангийн Монгол дахь Суурин төлөөлөгч Л.Баян-Алтай уулзалтыг нээлээ. Тэрээр “Төслийн хүрээнд олон амжилт гаргажээ. Өнөөдөр төслийн эхний жилийн үр дүнгээ танилцуулахын зэрэгцээ энэ хугацаанд хуримтлуулсан туршлага, сургамжаа ярилцахаар ирээд байна. Үр дүнгээс гадна цаашид сайжууулах ажлуудаа ч хэлэлцэнэ” хэмээн дурдлаа.
Япон улсын Элчин сайдын яамны хоёрдугаар нарийн бичгийн дарга Такаши Үмэда уулзалтад уригдаж хэлсэн үгэндээ “Өнөөдөр төслийн нэг жилийн үйл ажиллагааг дүгнэн, үр дүнг танилцуулж, санал солилцохоор холбогдох хүмүүс хүрэлцэн ирсэн байна. Энэхүү төсөл ямар үр дүнд хүрсэнийг хуваалцан, идэвхтэй санал солилцсоноор өнгөрсөн нэг жилд хэрэгжсэн ажлаа эргэн харж дүгнэх чухал боломж олдож байна” хэмээн онцлов.
Уулзалтад Эрүүл мэндийн яам, Боловсролын яам, Гэр бүл, хөдөлмөр, нийгмийн хамгааллын яамны хэлтсийн дарга, мэргэжилтэн бага насны хүүхдийн тэгш хамруулах боловсрол, хөгжлийн чиглэлээр баримталж буй бодлого, хэрэгжилт, бага насны хүүхдийн эрүүл мэндийн чиглэлээр баримталж буй бодлого, хэрэгжилт, хөгжлийн бэрхшээлтэй хүүхдийн ЭМБНХ-ны комиссын талаар баримталж буй бодлого, хэрэгжилтийн талаар танилцууллаа.
Энэхүү төслийн хэрэгжилтийн эхний жилд олон үр дүн гарчээ. Тухайлбал, зорилтот цэцэрлэгийн багш нарын тэгш хамруулах боловсролын талаарх онол, арга зүйн мэдлэг, ойлголтыг гүнзгийрүүлэх, хүүхдийн ялгаатай хэрэгцээнд нийцсэн сургалтын арга зүй эзэмшихэд туслах, өрхийн эмнэлгийн эмч, ажилтнуудын нялх, бага насны хүүхдийн хөгжлийн хоцрогдол, бэрхшээлийг эрт илрүүлэх арга зүйг сайжруулах, тэдэнд үзүүлэх анхан шатны эрүүл мэндийн тусламж үйлчилгээг чанаржуулах, хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын салбар комиссын гишүүдийг чадавхжуулах зорилго бүхий сургалтын 4 модуль, гарын авлагуудыг боловсруулж, холбогдох төрөлжсөн сургалтуудыг зохион байгуулсан юм. Эдгээр сургалтуудад 78 эмч, ажилтнууд, 148 цэцэрлэгийн багш, салбар комиссын 28 гишүүд хамрагджээ.
Түүнчлэн төслийн зорилтот Өрхийн эрүүл мэндийн таван төв, таван цэцэрлэгт тусгай хэрэгцээтэй хүүхдийн сурах үйл явцыг дэмжих “Хүүхэд хөгжлийн танхим” болон хүүхдийн эрүүл мэндийн үзлэгийн өрөө, булан байгуулж, хүүхдүүдэд зориулсан дэд бүтцийг сайжруулах засварын ажлууд хийж гүйцэтгэлээ. Төслийн үр шимийг нийт 20 гаруй мянган хүнд шууд хүргэсэн байна.
Туршлага солилцох уулзалтад Эрүүл мэндийн яам, Боловсролын яам, Гэр бүл, хөдөлмөр, нийгмийн хамгааллын яам, орон нутгийн төрийн захиргааны болон мэргэжлийн байгууллага, зорилтот Өрүүл мэндийн таван төв, таван цэцэрлэг, орон нутгийн боловсрол, эрүүл мэндийн газар, төрийн болон төрийн бус байгууллагуудын төлөөллүүд зэрэг 60 гаруй хүн оролцлоо. Энэ үеэр Сэлэнгэ аймгийн Сүхбаатар сумын “Энэрэх” өрхийн эрүүл мэндийн төвийн дарга Ц.Цэцэгсүрэнгээс төслийн үр дүнгийн талаар тодрууллаа. Тэрээр “Төсөл хэрэгжиснээр эмч, эмнэлгийн ажилтнууд, эцэг эхчүүд эрт илрүүлэгийн талаар мэдлэг, мэдээлэлтэй болсон. Ингэснээр үзлэгийн тоо 2025 онд өмнөх оноос нэмэгдсэн байгаа. Түүнчлэн эмч, эмнэлгийн ажилтнуудын хөгжлийн хоцрогдолтой хүүхдүүдэд өгөх зөвлөгөө өгөх ур чадвар нэмэгдэж, эрт илрүүлэг хийж чаддаг боллоо. Төслийн хүрээнд тоног төхөөрөмж авахын зэрэгцээ хөгжлийн бэрхшээлтэй хүмүүст зориулсан ариун цэврийн өрөө тохижуулж, эмнэлгийн гадна талд налуу зам байгуулсан” хэмээн ярилаа.
Баянхонгор аймгийн 16-р цэцэрлэгийн эрхлэгч С.Учралсайхан төслийн үр дүнгийн талаар “Төслийн хүрээнд ялгаатай хэрэгцээтэй хүүхдүүдийг хэрхэн сургуулийн өмнөх боловсролын байгууллагад хамруулах, үйлчилгээ үзүүлэх, эцэг эхчүүд хүүхдийнхээ ялгаатай байгаа бэрхшээлийг хүлээн зөвшөөрөх, хүүхдээ нийгэмшүүлэх явцад нь цаг алдалгүй ороход нь тустай сургалтууд явуулж, олон үр дүн гарлаа. Багш, ажилтнуудын хувьд тусгай хэрэгцээтэй хүүхдүүдтэй ажиллах мэдлэг, чадвараа нэмэгдүүлсэн. Төслөөс “Хүүхэд хөгжлийн танхим” байгуулж өгсөн. Тэнд төслөөс өгсөн тоног төхөөрөмж, тоглоомоо байрлуулсан байгаа” хэмээн ярилаа.
Энэ үеэр төслийн үр дүн, сайн туршлагын талаар олон танилцуулга, илтгэл явагдав. Уулзалтын төгсгөлд төслийн эхний жилийн үр дүн, сургамж, дүгнэлтээ танилцуулж, оролцогчдын асуултад хариуллаа. Мөн Баянхонгор, Сэлэнгэ аймгаас ирсэн төсөл хэрэгжүүлэгчдийн төлөөллүүдэд тоног төхөөрөмж гардуулж өгөв.