“Тэгш хүртээмжтэй, цогц үйлчилгээгээр бага насны хүүхдийн хөгжлийг дэмжих нь” төслийг хэрэгжүүлэх 2-р шатны гэрээнд гарын үсэг зурлаа

Хүүхдийг Ивээх Сан Япон улсын Гадаад хэргийн яамны санхүүжилтээр “Тэгш хүртээмжтэй, цогц үйлчилгээгээр бага насны хүүхдийн хөгжлийг дэмжих нь” төслийг 2024 оны 3 дугаар  сараас эхлэн хэрэгжүүлсэн билээ. Энэхүү төслийн 2 дахь үе шатыг хэрэгжүүлэх гэрээнд гарын үсэг зурах ёслол 2025 оны 3 дугаар сарын 26-нд Япон Улсын Элчин сайдын яаманд боллоо.  Гэрээнд Япон Улсаас Монгол Улсад суугаа Онц бөгөөд Бүрэн эрхт Элчин сайд Игавахара Масарү, Хүүхдийг Ивээх Сангийн Монгол дахь Суурин төлөөлөгч Л.Баян-Алтай нар гарын үсэг зурав.

                           

Элчин сайд Игавахара Масарү “Энэ удаа гарын үсэг зурсан “Тэгш хүртээмжтэй, тогтвортой, цогц үйлчилгээгээр бага насны хүүхдийн хөгжлийг дэмжих нь” төсөл нь өмнөх жил хэрэгжүүлсэн төслийн үргэлжлэл байдлаар хэрэгжих болно. Цаашид энэ төслийн хүрээнд зорилтот байгууллагуудын үйл ажиллагааг улам бэхжүүлж, төсөлд хамрагдах зорилтот Өрхийн  эрүүл мэндийн төв, цэцэрлэгийн тоог нэмэгдүүлэн, бага насны тусгай хэрэгцээтэй хүүхдэд үзүүлэх хөгжлийн дэмжлэг туслалцааг улам бүр өргөжүүлэх тогтолцоог бүрдүүлнэ хэмээн найдаж байна. Японы ард түмний чин сэтгэлийн тусламжаар хэрэгжих энэхүү төслийг үр дүнтэй хэрэгжүүлж, хяналт тавин ажиллахыг Японы Хүүхдийг Ивээх Сан болон хамтрагч талуудаас хичээнгүйлэн хүсэж байна” хэмээн хэлсэн үгэндээ онцлов.

                           

Хүүхдийг Ивээх Сангийн Монгол дахь Суурин төлөөлөгч Л.Баян-Алтай “Энэхүү төслийн эхний шатны үйл ажиллагааг нийслэлийн Чингэлтэй, Баянзүрх, Сонгинохайрхан дүүрэг, Баянхонгор, Сэлэнгэ аймагт тус тус амжилттай хэрэгжүүлж дууслаа. Өнгөрсөн хугацаанд гарсан төслийн зарим амжилтаас дурдахад зорилтот 5 Өрхийн эрүүл мэндийн төв, 5 цэцэрлэгийн тусгай хэрэгцээт иргэн, хүүхдүүдэд зориулсан хүртээмжтэй дэд бүтцийн засварыг хийж, налуу зам, туслах хэрэгсэл, ариун цэврийн өрөөний угаалтуур, суултуурыг шинээр суурилуулан ашиглалтад орууллаа. Мөн дээрх ӨЭМТ-ийг  бага насны хүүхдийн эрүүл мэндийн үзлэг, хөгжлийн үнэлгээнд шаардлагатай материал, хэрэгслээр хангасан. Хөгжлийн дэмжлэг шаардлагатай хүүхдийн боловсролын  хэрэгцээг хангах зорилгоор зорилтот  цэцэрлэгүүдэд “Хүүхдийн хөгжлийг дэмжих танхим”-ыг шинээр байгууллаа” хэмээн өгүүллээ.

Гарын үсэг зурах ёслолд Японы Элчин сайдын яамны ажилтнууд, Хүүхдийг Ивээх Сан, Эрүүл Мэндийн яам, Боловсролын яам, Гэр бүл, Хөдөлмөр, Нийгмийн Хамгааллын яамны төлөөллүүд тус тус оролцлоо.

Гарын үсэг зурах ёслолын үеэр дээрх төслийн хүрээнд гаргасан сургалтын гарын авлага,  мэдээллийн хуудас зэрэг хэвлэмэл материалуудыг дэлгэн үзүүлэв.