Боловсролын ерөнхий газар хувь хүний ур чадвар хөгжүүлэх төслийн үр дүнг түгээн дэлгэрүүлэхэд хамтран ажиллана
Хүүхдийг Ивээх Сангийн Монгол дахь суурин төлөөлөгч Л.Баян-Алтай, Хүүхдийг Ивээх Сангийн хэрэгжүүлж буй “Орон нутгийн өсвөр үеийнхэнд хувь хүний ур чадвар, энтрепренершип боловсрол олгох” төслийн менежер Ё.Нямдаваа нар Боловсролын ерөнхий газрын дарга Т.Ням-Очиртой уулзаж, “Орон нутгийн өсвөр үеийнхэнд хувь хүний ур чадвар, энтрепренершип боловсрол олгох” төслийн үр дүн, тогтвортой байдлыг хангах, түгээн дэлгэрүүлэх талаар саналаа солилцов. Уг уулзалтад Боловсролын ерөнхий газрын мэргэжилтнүүд оролцлоо.
Хүүхдийг Ивээх Сангийн Монгол дахь суурин төлөөлөгч Л.Баян-Алтай төсөл Ховд, Завхан, Өвөрхангай, Говьсүмбэр, Сүхбаатар аймгийн 29 суманд амжиллтай хэрэгжиж, нийт 8773 хүүхэд, залуусыг “Энтрепренершипд суурилсан хувь хүний ур чадвар хөгжүүлэх” (ESEL) сургалтад хамруулж, 360 бичил төсөлд тэрбум гаруй төгрөгийн тэтгэлэг өгсөн талаараа танилцуулав. Мөн зорилтот таван аймгийн зургаан сумын ерөнхий боловсролын сургууль “Сургуульд суурилсан энтерпрайз” төсөл хэрэгжүүлж байгаа талаар ярилаа.
“Орон нутгийн өсвөр үеийнхэнд хувь хүний ур чадвар, энтрепренершип боловсрол олгох” төслийн менежер Ё.Нямдаваа төслөөс ESEL хөтөлбөрийн 50 мастер багш нарыг бэлтгэснээр тэдний оролцоотойгоор ESEL-ын багш бэлтгэх боломж бүрдсэн талаар ярилаа. Түүнчлэн хувь хүний ур чадвар, энтрепренершип боловсрол олгох шинэлэг, оролцоонд тулгуурласан, төсөлд суурилсан сургалтын хөтөлбөр боловсруулан Мэргэжлийн боловсролын сургалтын хөтөлбөрийн үндсэн судлагдахууны нэг болгосон тухайгаа танилцуулав. Мөн зорилтот аймаг, сум, үндэсний хэмжээнд түгээн дэлгэрүүлэх, тогтвортой байдлыг хангах стратеги боловсруулсан, сургалтын гарын авлагуудын шинэчилж, интерактив дижитал хувилбарт шилжүүлсэн гэлээ.
Боловсролын ерөнхий газрын дарга Т.Ням-Очир “Орон нутгийн өсвөр үеийнхэнд хувь хүний ур чадвар, энтрепренершип боловсрол олгох” төсөл төсөөлөөгүй том үр дүн гаргасан гээд хүүхэд, залууст дутагдаж байсан хувь хүний ур чадвар эзэмшүүлж, бигээс чи, бид болон хөгжих гэсэн ойлголт бий болгосноороо давуу талтай байсан хэмээн онцлов. Мөн төслийн тогтвортой байдлыг хангах, түгээн дэлгэрүүлэхэд аймаг, сумуудын Засаг дарга нартай хамтран ажиллах, аймгуудын Боловсролын газрын удирдлагуудад 2025-2026 оны хичээлийн жилд төслийг хэрэгжүүлэх талаар танилцуулна хэмээн ярилаа.
Төслийн хүрээнд Энтрепренершипд суурилсан хувь хүний ур чадвар хөгжүүлэх (ESEL) сургалтын гарын авлагуудаа шинэчлэн боловсруулж гаргасан бөгөөд дээжээс нь Боловсролын ерөнхий газрын дарга Т.Ням-Очирт гардуулан өглөө.