Хүмүүнлэгийн тусламжийн хөтөлбөр нь гамшиг, хямралд өртсөн эмзэг бүлгийн хүүхэд, гэр бүл, малчдад чанартай хүмүүнлэгийн тусламжийг цаг алдалгүй хүргэх, болзошгүй эрсдэлээс урьдчилан сэргийлэх, бэлэн байх, эрсдэлийг даван туулахад нь дэмжлэг үзүүлэх зорилготой үйл ажиллагаагаа явуулдаг. Хүмүүнлэгийн тусламж үзүүлэхдээ гамшгийн үеийн хүүхдийн боловсрол, хүүхэд хамгааллын асуудалд онцгой анхаарч байна.

Хүүхдийг Ивээх Сан гамшиг, хямралын үед Засгийн газартай хамтарч, хүмүүнлэгийн нэгдсэн арга хэмжээ авах зорилго бүхий Монгол Улс дахь НҮБ-аар ахлуулсан Хүмүүнлэгийн багийн идэвхтэй гишүүн бөгөөд НҮБ-ын Хүүхдийн сангийн хамт энэхүү Хүмүүнлэгийн багийн Боловсролын бүлгийг ахлан ажиллаж байна. Өнгөрсөн хугацаанд зудад өртсөн малчдын хүүхдүүдийн боловсролд анхаарах, гэр бүлд нь дэмжлэг үзүүлэх замаар хүүхэд багачуудыг эрсдэлээс сэргийлж, дэмжих төслүүд хэрэгжүүлж, “Малчдын хүүхдэд хүргэх тусламж”, “Малчдын амьжиргааг хамгаалах чиглэлийн тусламж”, “Малчдыг дахин малжуулах тусламж”, “Малчдад үзүүлэх эрүүл мэндийн тусламж” зэрэг тусламжийн үйл ажиллагаанууд явууллаа.